Մեդիա նախաձեռնությունների կենտրոնը հայտարարում է «Թվապատում» լրագրողական 7-րդ մրցույթը: Մրցույթի նպատակն է խրախուսել որակյալ լրագրողական պատմությունների ստեղծումն ու տարածումը, նպաստել հասարակության բազմակողմանի տեղեկացվածությանը և իրազեկմանը՝ երկրում ընթացող իրադարձությունների, մարդու իրավունքների, ընտրությունների, ճգնաժամերի, համավարակի և հետպատերազմական իրավիճակում մարդասիրական խնդիրների և դրանց հնարավոր լուծումների, հանրային սեկտորի թափանցիկության և հաշվետվողականության, երկրի կայունացման ճանապարհների, բարեփոխումների և հնարավոր տնտեսական լուծումների վերաբերյալ։ Թվապատման մաս է նաև «Ես եմ մեդիան» ուսանողական մրցույթը, որի այս տարվա խորագիրն է #ԴԻՄԱԿայումենք տեղեկատվական սպառնալիքներին։
«Թվապատում 2021. պատմություններ փոփոխությունների մասին» մրցույթին ներկայացված հայտերը պետք է համապատասխանեն հետևյալ անվանակարգերից որևէ մեկին`
- Homo Agendi (Գործող անձ)
- Ռեինֆորմացիա
- Դիտակ
- Արտակարգ Գրություն
Ժամկետներ և պայմաններ
Նյութերը պետք է հրապարակված լինեն 2020 թ օգոստոսի 1-ից 2021թ. հուլիսի 30-ը ժամանակահատվածում հայաստանյան (Հայաստանում գրանցված) լրատվամիջոցներում՝ անկախ տեսակից (հեռուստաընկերություն, ռադիո, տպագիր, օնլայն) և ժանրից (լրատվական նյութ, հատուկ ռեպորտաժ, վերլուծական հոդված, հարցազրույց, լրագրողական հետաքննություն, հեղինակային սյունակ, վավերագրական ֆիլմ, ֆոտոռեպորտաժ, ժամանակակից մուլտիմեդիա ժանրեր, փոթկաստ և այլն):
Հեղինակը կարող է ներկայացնել առավելագույնը 3 նյութ (լրացնելով 3 տարբեր հայտ)՝ միևնույն կամ տարբեր անվանակարգերում: Մրցույթի կանոնակարգին կարող եք ծանոթանալ այստեղ:
Մրցույթին չեն կարող ներկայացվել այն նյութերը, որոնք ստեղծվել են «Մեդիան քաղաքացիների տեղեկացված մասնակցության համար» ծրագրի շրջանակներում։
Մասնակցելու համար անհրաժեշտ է լրացնել հայտը՝ մինչև 2021 թ. հուլիսի 31-ը ներառյալ: Մրցանակաբաշխությունը տեղի կունենա 2021 թ-ի հոկտեմբերին:
Հարցերի դեպքում կարող եք դիմել
Արեն Մանուկյանին, էլ. հասցե՝ [email protected], հեռ.՝ 010 583620 (ներքին՝ 112), 099 225075
Անի Դարբինյանին, էլ. հասցե՝ [email protected], հեռ.՝ 010 583620 (ներքին՝ 126)
Homo Agendi (Գործող անձ)
Նյութի առանցքում հերոսն է՝ իր անձնական նվաճումներով, ակտիվ քաղաքացիական դիրքորոշմամբ, միջավայրն ու իրավիճակը բարելավելու, մարդկանց օգնելու հնարավորությամբ ու փորձով: Այս անվանակարգի նյութերը կարող են ներկայացնել մրցույթի թեմաներից ցանկացածը։
Կպարգևատրվի թե՛ հաղթող նյութի հեղինակը, թե՛ հերոսը՝ յուրաքանչյուրը 300 000-ական դրամով:
Ռեինֆորմացիա
Անվանակարգին ներկայացվող նյութերը պատմում են տարբեր ոլորտներում իրականացվող փոփոխությունների էության, ընթացքի, խնդիրների և խոչընդոտների, հաջողությունների ու անհաջողությունների, այս գործընթացում ներգրավված կառավարության, հանրության, տարբեր կառույցների դերի, նրանց միջև համագործակցության հաջողված և անհաջող փորձերի, մասին:
Մրցանակը՝ 250 000 դրամ:
Դիտակ
Այս անվանակարգում ներկայացված նյութերը կարող են՝ ա․պատրաստված լինել լրագրողական հետաքննության ժանրում, պարունակել լրագրողական հետաքննության տարրեր; բ․հիմնաված լինել քողարկված, կամ անորոշ տեղեկատվության բացահայտման, փաստերի ստուգման ու ճշգրտման, ապատեղեկատվություն և մանիպուլյացիա բացահայտման վրա։ Աշխատանքները գնահատելիս հաշվի կառնվեն, տվյալների լրագրության և այլ նոր մեդիա գործիքների օգտագործումը:
Մրցանակը՝ 250 000 դրամ:
Արտակարգ Գրություն
Լրագրողական աշխատանքները կարող են անդրադառնալ Ղարաբաղյան վերջին պատերազմի հետևանքով առաջացած մարդասիրական խնդիրներին: Ուշադրության կենտրոնում կարող են լինել անհայտ կորածներն ու գերեվարված անձինք և նրանց հարազատները, մարտական գործողություններին կամ շփման գծին մոտ ապրող և տուժած քաղաքացիական անձինք, մարդասիրական աշխատանքներում ներգրավված մարդիկ, հակամարտության գոտում առկա այլ թեմաների և դրանց հետ կապված հերոսների պատմություններ։
Այս անվանակարգի նյութերը կարող են անդրադառնալ նաև մարդու իրավունքներին, ոլորտում առկա սուր խնդիրների բացահայտմանը, մարդկային ճակատագրերի պատմություններին, իրավունքների պաշտպանության գործում արդյունավետ պայքարի օրինակներին և այլն։ Լրագրողական աշխատանքները այս անվանակարգում կարող են ներկայացնել նաև Covid 19 համավարակից առաջացած խնդիրները հասարակության, առանձին մարդկանց կյանքում։
Մրցանակը՝ 250 000 դրամ:
«Ես եմ մեդիան» ուսանողական մրցույթ
«Թվապատում» մաս է նաև «Ես եմ մեդիան» ուսանողական մրցույթը, որի այս տարվա խորագիրն է #ԴԻՄԱԿայումենք տեղեկատվական սպառնալիքներին։ Մրցույթը առիթ է ուսանողների համար՝ պատմելու պատերազմի եւ հետպատերազմական տեղեկատվական հոսքերի, դրանցում ճիշտն ու սուտը, մանիպուլյացիան ու փաստերը տարանջատելու փորձառության մասին, նաև վերհիշելու, թե ինչպես էին մարդիկ փորձում ինքնակազմակերպվել թիկունքում՝ սոցիալական ցանցերի միջոցով։ Մրցույթի մասին բոլոր մանրամասները՝ այստեղ։
«Թվապատում 2021»-ի ժյուրիի կազմը
ՀԱՃԱԽ ՏՐՎՈՂ ՀԱՐՑԵՐ
Ո՞վ կարող է դիմել մրցույթին
Ո՞վ է ստանում մրցանակը:
Կարելի՞ է մրցույթին ներկայացնել ոչ պրոֆեսիոնալ լրատվամիջոցում, բիզնես կամ հասարակական կազմակերպության կայքում հրապարակված նյութ:
Կարելի՞ է ներկայացնել չհրապարակված նյութ:
Կարելի՞ է մրցույթին ներկայացնել ոչ հայաստանյան լրատվամիջոցում հրապարակված նյութ:
Կարելի՞ է օտար լեզվով նյութ ներկայացնել:
Կարելի՞ է մրցույթին ներկայացնել նյութեր, որոնք վերբեռնված չեն որևէ առցանց հարթակում:
Որո՞նք են նյութի տեխնիկական պահանջները:
Առավելագույնը քանի՞ նյութ կարող է ներկայացնել մեկ հեղինակը:
Կարո՞ղ է հեղինակը մեկից ավելի հայտ ներկայացնել միևնույն անվանակարգի համար:
Կարո՞ղ է հեղինակը միևնույն նյութը ներկայացնել տարբեր անվանակարգերի համար:
Եթե նյութը համապատասխանում է մի քանի անվանակարգերի, ինչպե՞ս ընտրել՝ որ մեկին ներկայացնել:
Ինչպե՞ս են ընտրվում հաղթողները:
Ովքե՞ր են ընդգրկված ժյուրիի կազմում:
Ի՞նչ մրցանակներ են ստանում հաղթողները:
Ի՞նչ հաճախականությամբ է անցկացվում մրցույթը:
Ու՞մ դիմել հարցերի դեպքում:
ՆՈՐՈՒԹՅՈՒՆՆԵՐ
ԿԱԶՄԱԿԵՐՊԻՉՆԵՐ
«Թվապատում» մրցույթը կազմակերպվում է Ամերիկայի ժողովրդի աջակցությամբ՝ ԱՄՆ Միջազգային զարգացման գործակալության միջոցով իրականացվող «Մեդիան քաղաքացիների տեղեկացված մասնակցության համար» ծրագրի շրջանակում: Այն իրականացնում է Մեդիա նախաձեռնությունների կենտրոնը: Միջոցառմանն աջակցում է Կարմիր խաչի միջազգային կոմիտեն:
ՄԵՐ ՄԱՍԻՆ
Մեդիա նախաձեռնությունների կենտրոնն աջակցում է արտահայտման ազատությանն ու լրատվամիջոցների որակի բարելավմանը, նպաստում է մեդիագրագիտության տարածմանը, մասնակցում է մեդիա օրենսդրության բարելավմանն ու լրագրողների իրավունքների պաշտպանության աշխատանքներին: Իր գործունեության քսան տարիների ընթացքում կազմակերպությունն անցկացրել է մոտ 800 դասընթաց մեդիա մենեջմենթի, հեռուստառադիո արտադրության, հետաքննական, մուլտիմեդիա և քաղաքացիական լրագրության, նոր մեդիայի և մեդիագրագիտության թեմաներով՝ կրթելով շուրջ 3500 փորձառու և սկսնակ լրագրողների, քաղաքացիական հասարակության կազմակերպությունների ներկայացուցիչների: ՄՆԿ-ի հեղինակած հեռուստատեսային, ռադիո և ինտերնետային հարուստ արտադրանքն անդրադառնում է մարդու իրավունքների, հակամարտությունների, միգրացիայի, ընտրությունների, ազգային փոքրամասնությունների, գենդերային և այլ թեմաներին:
Կազմակերպությունը Հայաստանում գործում է 1995 թ.-ից՝ Մամուլի աջակցության «Ինտերնյուս» հասարակական կազմակերպություն անվամբ: 2013թ․-ի հուլիսին վերանվանվել է և գործում է «Մեդիա նախաձեռնությունների կենտրոն» անվամբ: