Մեդիա նախաձեռնությունների կենտրոնը հայտարարում է «Թվապատում 2023» լրագրողական մրցույթը: Նպատակն է խրախուսել որակյալ և պատասխանատու լրագրության զարգացումը, մարդակենտրոն պատմությունների ստեղծումն ու տարածումը, նորարար մոտեցումների, ժամանակակից գործիքների կիրառումը, մասնագիտական էթիկայի սկզբունքների պահպանումը և արժևորումը։ «Թվապատումը» նպաստում է հասարակության բազմակողմանի տեղեկացվածությանը՝ երկրում ընթացող իրադարձությունների և զարգացումների մասին, մարդու իրավունքների, ճգնաժամերի, մարդասիրական խնդիրների, տնտեսության տարբեր ճյուղերի, կայունացման ճանապարհների և հնարավոր լուծումների վերաբերյալ՝ խրախուսելով հավաստի լրատվությունը ու լրագրության բազմաշերտ, վերլուծական ժանրերը, ինչպիսիք են հետաքննական, բացատրական և տվյալների լրագրությունը։
«Թվապատում 2023» մրցույթին ներկայացված հայտերը պետք է համապատասխանեն հետևյալ անվանակարգերի պայմաններին`
- Homo Agendi (Գործող անձ)
- Դիտակ
- Մեդիա 3.0․ տեխնոլոգիաների լավագույն կիրառում
- ԱզդեցIQ
- Արտակարգ Գրություն
- Լուսաբանելով գիտությունը
Ժամկետներ և պայմաններ
Նյութերը պետք է հրապարակված լինեն 2022 թ-ի օգոստոսի 31-ից մինչև 2023 թ-ի սեպտեմբերի 10-ը ժամանակահատվածում հայաստանյան (Հայաստանում գրանցված) լրատվամիջոցներում՝ անկախ տեսակից (հեռուստատեսություն, ռադիո, տպագիր, օնլայն, սոցիալական մեդիա) և ժանրից (լրատվական նյութ, հատուկ ռեպորտաժ, վերլուծական հոդված, հարցազրույց, լրագրողական հետաքննություն, հեղինակային սյունակ, վավերագրական ֆիլմ, ֆոտոռեպորտաժ, մուլտիմեդիա, փոդքասթ և այլն):
Հեղինակը կարող է ներկայացնել առավելագույնը 3 նյութ (լրացնելով 3 տարբեր հայտ)՝ միևնույն կամ տարբեր անվանակարգերում: Մրցույթի կանոնակարգին կարող եք ծանոթանալ այստեղ:
Մասնակցելու համար անհրաժեշտ է լրացնել հայտը՝ մինչև 2023 թ. սեպտեմբերի 10-ը ներառյալ: Մրցանակաբաշխությունը տեղի կունենա 2023 թ-ի հոկտեմբերին:
Ուշադրություն. «Թվապատում» մրցույթին չեն կարող ներկայացվել այն լրագրողական աշխատանքները, որոնք ստեղծվել են Մեդիա նախաձեռնությունների կենտրոնի կամ ՄՆԿ-ի մասնակցությամբ իրականացված ծրագրերի շրջանակում տրամադրված դրամաշնորհների միջոցով։
Հարցերի դեպքում կարող եք դիմել
Արշալույս Մուրադյանին` [email protected] էլ. հասցեով, հեռ․՝ 010 58 36 20, 055 56 32 36:
Անի Դարբինյանին՝ [email protected] էլ. հասցեով, հեռ.՝ 010 583620, 093 26 04 77:
Homo Agendi (Գործող անձ)
Անվանակարգի առանցքում հերոսն է՝ իր նախաձեռնություններով, քաղաքացիական դիրքորոշմամբ, միջավայրն ու իրավիճակը փոխելու և բարելավելու, մարդկանց օգնելու փորձով և օրինակներով։ Թեմատիկ սահմանափակում չկա։
Homo Agendi անվանակարգում պարգևատրվում է թե՛ հաղթող նյութի հեղինակը, թե՛ հերոսը, յուրաքանչյուրը՝ 300 000-ական դրամով:
Մեդիա 3.0․ տեխնոլոգիաների լավագույն կիրառում
Անվանակարգը խրախուսում է լրագրության ասելիքի և արդի տեխնոլոգիաների համադրությունը՝ առանց թեմատիկ սահմանափակումների։ Նյութերում պետք է օգտագործված լինեն նորարարական մոտեցումներ, պատմությունները ներկայացվեն արդի հարթակների և գործիքների միջոցով, ինտերակտիվ լուծումներով։ Այս անվանակարգը կգնահատի ստեղծագործական աշխատանքն ու մեդիայի թվային հնարավորությունների լավագույն կիրառումը։
Մրցանակը՝ 250 000 դրամ:
Դիտակ
Այս անվանակարգում ընդունվում են հետաքննական, բացատրական լրագրության, փաստերի ստուգման օրինակներ, որոնք ճշգրտում, վերլուծում, բացատրում և բացահայտում են քողարկված, անորոշ, մոլորեցնող տեղեկատվություն, այդ թվում ապատեղեկատվություն և մանիպուլյացիա։ Աշխատանքները գնահատելիս` հաշվի կառնվեն տվյալների լրագրության հմտությունները, փաստերի ստուգման մասնագիտական վարպետությունը և արդի մեդիա գործիքների կիրառումը:
Մրցանակը՝ 250 000 դրամ:
ԱզդեցIQ
Այս անվանակարգում գնահատվում և կարևորվում է սոցիալական հարթակներում թվային բովանդակություն ստեղծելու հեղինակային մոտեցումը։ Կդիտարկվեն լսարանին տեղեկացնելու, կրթելու, ոգեշնչելու և պատմելու օրինակներ, որոնք սոցիալական հարթակների հնարավորություններն օգտագործում են հանրային կարևորություն ունեցող թեմաները վերհանելու, դրանց մասին պատմելու համար։ Անվանակարգը խրախուսում է ոչ միայն սոցիալական հարթակներում հեղինակի (digital creator) ուրույն տեղն ու դերը, այլև նրա ստեղծած ազդեցիկ ու ինքնատիպ բովանդակությունը, ասելիքի արդիականությունն ու արժանահավատությունը։
Մրցանակը՝ 250,000 դրամ
Արտակարգ Գրություն
Հիմնական անվանակարգերից բացի հատուկ մրցանակի կարժանանան Հայաստանում և Հայաստանին առնչվող ճգնաժամերի, մասնավորապես՝ Ղարաբաղյան հակամարտությանը վերաբերող մարդասիրական խնդիրների մասին պատմող լրագրողական աշխատանքներ։ Նյութերը կարող են առնչվել սահմանամերձ բնակչության, անհայտ կորած անձանց և նրանց ընտանիքների խնդիրներին, անվտանգության և կենսական այլ հարցերի, հակամարտության հետևանքով փոխված մարդկային ճակատագրերին և այլն։
Մրցանակը՝ 250 000 դրամ
Լուսաբանելով գիտությունը
Հատուկ մրցանակի կարժանանա նաև գիտության թեմայով լավագույն լրագրողական աշխատանքը։ Նյութերը կարող են ներկայացված լինել ցանկացած ժանրով և ձևաչափով։
Մրցանակը՝ 200 000 դրամ։
Ընտրող հանձնաժողովի հայեցողությամբ կարող են շնորհվել նաև այլ հատուկ և/կամ խրախուսական մրցանակներ։
ՀԱՃԱԽ ՏՐՎՈՂ ՀԱՐՑԵՐ
Ո՞վ կարող է դիմել մրցույթին
Ո՞վ է ստանում մրցանակը:
Կարելի՞ է մրցույթին ներկայացնել ոչ պրոֆեսիոնալ լրատվամիջոցում, բիզնես կամ հասարակական կազմակերպության կայքում հրապարակված նյութ:
Կարելի՞ է ներկայացնել չհրապարակված նյութ:
Կարելի՞ է մրցույթին ներկայացնել ոչ հայաստանյան լրատվամիջոցում հրապարակված նյութ:
Կարելի՞ է օտար լեզվով նյութ ներկայացնել:
Կարելի՞ է մրցույթին ներկայացնել նյութեր, որոնք վերբեռնված չեն որևէ առցանց հարթակում:
Որո՞նք են նյութի տեխնիկական պահանջները:
Առավելագույնը քանի՞ նյութ կարող է ներկայացնել մեկ հեղինակը:
Կարո՞ղ է հեղինակը մեկից ավելի հայտ ներկայացնել միևնույն անվանակարգի համար:
Կարո՞ղ է հեղինակը միևնույն նյութը ներկայացնել տարբեր անվանակարգերի համար:
Եթե նյութը համապատասխանում է մի քանի անվանակարգերի, ինչպե՞ս ընտրել՝ որ մեկին ներկայացնել:
Ինչպե՞ս են ընտրվում հաղթողները:
Ովքե՞ր են ընդգրկված ժյուրիի կազմում:
Ի՞նչ մրցանակներ են ստանում հաղթողները:
Ի՞նչ հաճախականությամբ է անցկացվում մրցույթը:
Ու՞մ դիմել հարցերի դեպքում:
ՆՈՐՈՒԹՅՈՒՆՆԵՐ
ԿԱԶՄԱԿԵՐՊԻՉՆԵՐ
«Թվապատում 2023» լրագրողական մրցույթը կազմակերպվում է Ամերիկայի ժողովրդի աջակցությամբ՝ ԱՄՆ Միջազգային զարգացման գործակալության միջոցով իրականացվող «Հայաստանի մեդիայի զարգացման ծրագրի» շրջանակում: Ծրագիրն իրականացնում է Ինտերնյուս կազմակերպությունը՝ Մեդիա նախաձեռնությունների կենտրոնի, Երևանի մամուլի ակումբի և «Զինք» միջազգային կազմակերպության հետ համատեղ։ Միջոցառմանն աջակցում են Կարմիր խաչի միջազգային կոմիտեն և «Գիտուժ» նախաձեռնությունը:
ՄԵՐ ՄԱՍԻՆ
Մեդիա նախաձեռնությունների կենտրոնն աջակցում է արտահայտման ազատությանն ու լրատվամիջոցների որակի բարելավմանը, նպաստում է մեդիագրագիտության տարածմանը, մասնակցում է մեդիա օրենսդրության բարելավմանն ու լրագրողների իրավունքների պաշտպանության աշխատանքներին: Իր գործունեության քսան տարիների ընթացքում կազմակերպությունն անցկացրել է մոտ 800 դասընթաց մեդիա մենեջմենթի, հեռուստառադիո արտադրության, հետաքննական, մուլտիմեդիա և քաղաքացիական լրագրության, նոր մեդիայի և մեդիագրագիտության թեմաներով՝ կրթելով շուրջ 3500 փորձառու և սկսնակ լրագրողների, քաղաքացիական հասարակության կազմակերպությունների ներկայացուցիչների: ՄՆԿ-ի հեղինակած հեռուստատեսային, ռադիո և ինտերնետային հարուստ արտադրանքն անդրադառնում է մարդու իրավունքների, հակամարտությունների, միգրացիայի, ընտրությունների, ազգային փոքրամասնությունների, գենդերային և այլ թեմաներին:
Կազմակերպությունը Հայաստանում գործում է 1995 թ.-ից՝ Մամուլի աջակցության «Ինտերնյուս» հասարակական կազմակերպություն անվամբ: 2013թ․-ի հուլիսին վերանվանվել է և գործում է «Մեդիա նախաձեռնությունների կենտրոն» անվամբ: